මගේ පියා විල්සන් හෑගොඩ ය. ඔහු ශ්‍රී ලංකා ජාතික චායාරූප කලා සංගමයේ නිර්මාතෘ වරයා විය. කවියෙකු ද වූ ඔහු අගනුවර තරුණ කවි සමාජයේ (අතකස) ආරම්භක සාමාජික පස් දෙනාගෙන් කෙනෙකි. මාගේ සහෝදරයා ලාල් හෑගොඩ ය. 1973 දී දේවෝ වස්සතු කාලේන නමින් මාගේ නිසඳැස් කවි පොතක් මුද්‍රණයෙන් ප්‍රකාශයට පත් කලෙමි. 1989 දී එංගලන්තයේ සහ වේල්සයේ සොලිසිටර් වරයෙකු ලෙස දිවුරුම් දුන්නෙමි. මා විසින් ලියන්නට යෙදුණු තීරු ලිපි බ්‍රිතාන්‍යයේ ලංකා විත්ති, ශ්‍රී ලංකාවේ ලක්බිම, දිවයින, සිළුමිණ සහ Daily News පුවත් පත්හී පළ වුනු අතර ඒවායින් තෝරාගත් ලිපි එකතු කොට ගොඩයාගේ කොලම සහ ලන්ඩන් ගොඩයාගේ කොලම නමින් පොත් දෙකක් කලෙමි. බන්දුල විතානගේ අධක්‍ෂණය කළ රෝමය ගිනි ගනී වේදිකා නාට්‍යය නිෂ්පාදනය කලෙමි. රොඩ්නි විදානපතිරණ ගේ හෙමන්තේ වසන්තයක් ටෙලි නාට්‍යයේ සම නිෂ්පාදක වූ මා පරාක්‍රම නිරිඇල්ල ගේ විල්බැඳි දනවු වේ විධායක නිෂ්පාදක වුනෙමි. මා ලියු ගීත ගණනාවක් පටිගත කොට ඇති අතර ආචාර්ය නන්දා මාලිනී , එඩ්වඩ් ජයකොඩි, චරිතා ප්‍රියදර්ශනී, අමරසිරි පිරිස්, ශෂික නිසංසලා, මීනා ප්‍රසාධිනී ආදී හු ඒ ගී ගයා තිබේ.